'Sraadɛ -ɛ ‑wlʋa 'de 'blʋ 'ʋn ɛ
2
‑Bo nyɔ jrɔ' 'je 'sraadɛ ‑wlʋa 'de 'blʋ 'ʋn Nyɔsoa jaa, ‑mɛ ɛ nɩ faipʋ ‑ɛ ‑nmɔai" 'pepe, mɛ ɔ 'je 'cna ke paifɛn' o po. 2 Ɛ mɛ ɔ 'je Aarɔn ɔ' "nynuu ‑nɩa 'sraa ‑saʋn ja-. Ʋʋa' due' a muɛ faipʋ 'cna ke paifɛn' nɩa o 'mʋʋa‑ kwa o ‑puuan', ‑wɛe ɔ 'jeɛ "jri po 'de "kpa "kpei, ɛ mɛ ‑nɩ ɔɔ' 'sraadɛ 'ɛ -tɩ' -kwlʋ o po dɛ o-. Ɛ nɩɛ 'sraa ɛ ‑wee' nɛ dia, ‑ɛɛ 'nʋ a jaa Kea 'a pɛe ja. 3 Ɛɛ' tɔo ‑sia 'e nɩɛ Aarɔn ke ɔɔ' "nynuu‑ 'a dɛ ‑o, ‑ɛ ‑nɩa 'sraadɛ ‑kwɛai 'pepe nɛ dia, ɛɛ' tɔo -siae' -kwɛi 'pepe ɛ nɩɛ 'sraadɛ -tea kpɔi" -ɛ -tea Nyɔsoa 'a -tea' ‑o.4 ‑Bo nyɔ jrɔ' ɔ' 'sraadɛ ɛ nɩ faipʋ ɔ bla, ‑mɛ ɔ 'boɛ ‑puun" dɛ o poɛ, ɛɛ' mɩɩ" ke ɛɛ' klae" ke, ɔ pi 'de 'cna o 'de ɔ 'jɩ 'cna "kpei i -fʋʋn. 5 ‑Bo ɛ nɩ 'sraadɛ nyʋ poa "jri 'de nɩɩɛ sai "kpei ɛ, ‑mɛ ɛ nɩ faipʋ ‑nɩa 'pepe nyɔ 'je 'cna nʋ ɔ 'jeɛ bla, ɔ 'boɛ ‑puun" dɛ o poɛ. 6 Nyɔ ɔ muɛ tii cɛan', ‑wɛe nyɔ 'jeɛ 'cna "kpei po, ɛ nɩɛ 'sraadɛ -wlʋa 'de 'blʋ 'ʋn ‑o. 7 ‑Bo ɛ nɩ 'sraadɛ nyɔ 'jea pi 'de poɛlɩa 'di ɛ, ‑mɛ ɛɛ' kpan ‑nɩa 'mʋʋa‑, 'cna ke faipʋ mɛ nyɔ 'jeɛ 'ʋn nʋʋ‑.
8 'Sraadɛ ɔ pia Nyɔsoa ‑pee 'kan 'mʋʋa‑, ɔɔ muɛ 'sraa ‑sai jaa', ‑wɛe ‑mɔ 'jeɛ 'de "kpa ‑ɛɛ "kpei nyʋ ‑saa 'sraa -pʋn" 'kpaa‑. 9 ‑Wɛe ɛɛ' 'fɔ 'sraa -sai 'jea Nyɔsoa "nyɩ, ‑ɛ ‑jea ɔɔ' 'sraadɛ nyʋ 'jea "jriɛ o sie nɩ, ‑wɛe ‑ɛ ‑wee' nɛ 'jea di 'de "kpa "kpei ‑o. Ɛ nɩɛ 'sraadɛ ‑ɛ ‑wee' nɛ dia, ‑wɛe ‑ɛɛ 'nʋ a jaa Nyɔsoa 'a pɛe 'ja ‑o. 10 Ɛɛ' tɔo ‑sia 'e nɩɛ Aarɔn ke ɔɔ' "nynuu‑ 'a dɛ ‑o, ‑ɛ ‑nɩa 'sraadɛ ‑kwɛai 'pepe nɛ dia, ɛɛ' tɔo -siae' -kwɛi 'pepe ɛ nɩɛ 'sraadɛ -tea kpɔi" -ɛ -tea Nyɔsoa 'a -tea' ‑o.
11 'Sraadɛ "oo 'sraadɛ -ɛ -wlua 'de 'blʋ 'ʋn nyɔ ɔ mua Nyɔsoa jaa', nyɔ seɛ ‑puun" dɛ o po i: Nyʋ se ‑puun" dɛ o, dʋ 'a 'cna "jri po i 'de Nyɔsoa "juɛi. 12 Nyʋ 'bɛɛ nyʋ 'jeɛ Nyɔsoa "nyɩ, ka nyɔ ɔ -saa dɩ 'a "i ‑saa ‑jɔ 'sraa 'ʋn, 'kaa nyʋ 'seɛ 'bɛɛ‑, nyʋ 'je 'sraadɛ -ɛ -wee' nɛ dia, ‑ɛɛ jaa Nyɔsoa 'a pɛe ja 'ʋn nʋʋ 'de "kpa "kpei. 13 Nyʋ a muɛ 'sraadɛ -wlʋa 'e 'blʋ 'ʋn -ɛ ‑wee' "klein nyʋ a ja, 'tɔn o poa'. Nyʋ se ɛɛ' 'tɔn o poa' o "mae i, ɛ mɛ ‑nɩ dbɛɛdɛ ‑nɩa nyʋ ke 'e Kea 'nynɩ 'a "jriɛ o sie dɛ.
14 ‑Bo ɛ nɩ dɛ -wlʋa 'de 'blʋ 'ʋn 'a "i -saa -jɔ nyɔ 'je 'sraa 'ʋn -saa ɔ 'je Nyɔsoa "nyɩ ɛ, -mɛ ɛ nɩ kplaa -ɛ -daa -wɛe -ɛ -dua, ɛmɛ ɔ 'je Nyɔsoa "nyɩ. 15 Ao po 'e 'cna, ɛ ke paifɛn' ke, ɛ mɛ ‑nɩ 'sraadɛ -wlʋa 'e 'blʋ 'ʋn. 16 'Sraa ‑sai 'a muɛ ɛɛ' "jriiɛ o sie dɛ -ɛ -nɩa ɛɛ' jɔ ɔ tɔo- ke 'cna o, paifɛn' ‑wee' "jri poa', ‑wɛe ɛ 'je "jriɛ o sie dɛ nɩ-. Ɛ nɩɛ 'sraadɛ ‑ɛ ‑wee' nɛ di a, ‑wɛe nyʋ "nyɩa Nyɔsoa ‑o.